Том 15 (XVII век)

В то же время корабленицы идяху по морю и присташа ко брегу, ко острову оному, идеже лвица пребываетъ, иже унесе сына царева. Изшедше ис корабля на островъ той и хождаху по нему плодовъ ради. И видяху следъ зверескъ и человеческъ, и идоша путемъ темъ. И узреша пещеру и приникше тамо, видяща лвицу лежащу и вскрай ея млада юношу и доброродна, лежаща. И удивишася велми, ужасошася, бежаша в корабль и протчимъ виденная поведаху. Сущии же в корабли, слышавше таковая, удивишася, хотяще истее уведати, совещавшеся, вземше оружие, поидоша на островъ той видети бывшее. И пришедше близъ вертепа того и приникша, видяща лвицу лежащу и вскрай ея юношу доброродна, лежаща нага. Лвица же зряша на нихъ тихимъ взоромъ и обращаху юношу зрети на нихъ, яко указуя. Корабленицы же удивишася, мысляху: «Что се хощетъ быти? И како безъ испытания хощемъ быти от дивныя сея вещи?» И вземъ брашно добро, и метнувше ко лвице. Воставши же и юноша; лвица, вземше брашно, ядоша, взирающе на кораблениковъ. Они же метнуша ризу добру. Лвица же, вземши, одея отрока. Они же метнуша и опоясание. Отрок же препоясася и близъ лвицы седе. Лвица же воставши и поиде ис пещеры, толко скабляющися и веселящися, зря на кораблениковъ образом же, яко любезнуя. Они же ужасошася, отступиша от пещеры. Изыде же юноша в следъ и поклоняшеся имъ. Они же приглашающе его к себе, махающе руками, показующе брашно в сосудехъ. Он же приступи к нимъ близъ. Они же поемше юношу того и ведоша на корабль свой. Он же не противляшеся имъ, идяше. Лвица же в следъ ихъ идущи. Корабленицы же цку восходную[1442] вземше в корабль, дабы оставити лвицу на брезе. Она же бредущи, вскочи на корабль скоро. Корабленицы же ужасошася, бежаша во един вскрай корабля. А лвица же, пришедши ко отроку своему и виде пред нимъ брашно добро, и нача ясти со отрокомъ темъ. И насытився, преклоняше главу свою, ласкаяся тихимъ взоромъ и крабленикомъ темъ придружашеся, аки молвити хотяше. Отрокъ же той кланяшеся имъ. Лвица же ляже ту на корабли. Отрок же иде х корабленикомъ темъ и вземъ единаго за руку, не умея глаголати, но немотуя, веде его ко лвице. Той же з боязнию иде по немъ. Отрок же повеле гладити лвицу. Она же ласкающися, придружашеся к ним. Корабленицы же удивишася зело, и тако единь по единому придружашеся ко лвице и ко отроку и быша без боязни. И поидоша въ путь свой, брегуще отрока и лвицу, и тешаще ихъ. Отрок же мало-помалу навыкая языку ихъ и наукомъ и искуству, и сам глаголати начиная.

И Божиимъ изволениемъ приидоша ко граду тому, идеже юноши того отецъ царьствуетъ, и присташа ко брегу, и идоша во градъ ко царю з дары своими. Царь же приятъ от нихъ дары и почте ихъ. Печаленъ бо бяше нашедшыя ради рати на царство его. Корабленицы же поведаша цареви, како на пути обретоша лвицу во острове и с нею юношу, доброродна и прекрасна зело, и разумична, и имеютъ ихъ на корабли своемъ. Слышавъ же царь, удивися и повеле лвицу и юношу привести пред ся. Корабленицы же, шедше, приведоша ихъ ко царю. Видевъ же царь лвицы тоя кротость и взирание ласкателное и юноши того доброродство и красоту и искуство, яко многихъ человекъ превзыде возрастом и добротою, удивишася и почте кораблениковъ. И повеле лвицу в некоемъ месте хранити и питати доброю пищею. Юноши же тому вда одеяние честно и устрой его пребывати близъ себе. Повеле же и ко лвице приходити часто, да не унываетъ. Юноша же той веселяшеся, навыкая языку и искуству. По времени же нецыи видеша юноши того храбрство, яко воинская тяжкая орудия пыташе, и крепкия доспехи на ся возлагаше, и храбро хождаше, обретеся паче всехъ во граде храбрыхъ и силныхъ, и глаголаше: «Исшелъ бы на брань противо ратныхъ». И поведаша цареви. Царь же, слышавъ таковая, возрадовася, призва его к себе и рече ему: «О юноше, аще даде ти Богъ храбрость и силу на ополчение к ратнымъ, послушай мене, яко отца, и буди ми сынъ, бездетну сущу царю. Изыде из града на отмщение ратнымъ и способствуй намъ. Аще подастъ ти Богъ помощъ и возвратися, победивъ, здравъ, азъ ти велию честь учиню. Аще будеши разуменъ и искусенъ в царских вещехъ, устрою тя в чину сана». Юноша же поклонися царю, глаголя: «Богъ да поможетъ ми молитвъ ради твоихъ. Отпусти мя противо сопостатовъ и даждь ми орудия воинская вся». Царь же возрадовася и повеле ему устроити, якоже хощетъ, и конь, яковъ ему годенъ. И помолився Богу и поклонився царю, изыде противо сопостатъ. И лвица она, услыша отрока того пошествие из града, растерза замки и двери и изыде ис храмины, идеже хранима бе.