Том 7 (Вторая половина XV века, литература эпохи исторических размышлений)

Въ лето 6985. <...> Того же лета заложи церковь камену въ Сергиеве манастыре Троицу псковские мастеры. Того же лета Аристотель колесо сътвори, и вверхъ камение не ношаше, но ужищемъ цепляше и възвлекаше, и верху цепляше малые колесца, еже плотники векшою зовуть, еже им на избы землю волочат, и чюдно видети. На столпы же по 4 камени велики положи, и съвокупивъ кружало, и истеса на нихъ по 4 концы на четырех странах, едино противъ другаго. И мнети кому, яко на каменыхъ деревьяхъ насквозь каменье то збито.[939]

В лето 6986. <...> Егда же бе князь великый въ Новегороде, прииде весть во Псковъ, яко немцы хотят изгонити Псковъ, и послаша къ великому князю. Князь же великый ослободи охочим людемъ итти на немцы. И, шедше, много повоеваша вои великого князя. И прииде на них местеръ съ вои и бишася. И поможе Богъ воемъ великого князя, и многихъ избиша, полону много взяша и отидоша. Бысть же великому князю в Новегороде, прииде весть ложная в Казань, яко не взялъ князь великый Новагорода, и побили его новугородцы, и самъ четвертъ убежа раненъ. И посла рать свою царь казанскый на Вятку. Потомъ царю прииде правая весть, что взялъ князь великый Новгородъ и наместники посажа.[940] И посла царь казанскый, и велелъ скоро воемъ своимъ възвратитися, они же слышавше, толь скоро бежаша, елико варяху въ котлех еству, все опрометаша. <...>

Въ лето 6986. Посла князь великый рать свою на Казань, воеводъ Василья Образца въ судехъ да Бориса Слепца.[941] И посла царь казанскый с челобитьемъ къ великому князю, князь же великый пожалова его.

Того же лета свершена бысть церкви каменая святая Богородица. Сътвори же у нея Аристотел верхи четыре, около шеи болшие казну сътвори, полати же подле олтаря от сторонних дверей учини,[942] и наверхъ церкви въсходити лествицу учини. Своды же въ одинъ кирпичь сътвори и сведе, того ради, егда дождь идеть, ина каплеть. На пятое лето съверши ея. Помостъ же мелкимъ камениемъ измости, въ олтаре же надъ митрополичемъ местомъ крыжь лятцкый истяса на камени за престоломъ, егоже митрополитъ последи стесати повеле. Передъ передними дверми помостъ накры каменьемъ, и въ одинъ кирпичь сведе, и середку на гире повеси на железной. Свяща же церковь митрополитъ Геронтей. И нецыи прелестницы клеветаша на митрополита князю великому, яко не по солнечному въсходу ходилъ митрополитъ съ кресты около церкви. Сего ради гневъ въздвиже на нь князь великый, яко того ради, рече, гневъ Божий приходит.[943]

Того же лета заложи князь великый церковь камену Иоана Златауста на посаде.

В лето 6987. Ездилъ князь великый в Новгородъ Великый и поималъ владыку Новугородцкого,[944] и посади на Москве у Михаилова Чюда в манастыре. И седелъ пол 3 лета, и ту преставися.

И много же им пыташе, и написаниа не обрете о священии церкви, что посолонь ли ходити, или не посолонь. Речей же много: овии по митрополите глаголаху архимандриты и игумены, иной рече: «Въ Святей горе виделъ, что так же свящали церковь, а со кресты против солнца ходили». И много о том спору чини князь великый, Генадиа призва архимандрита и владыку ростовскаго Васиана на споръ.[945] Митрополитъ свидетельство приводя: егда престолъ диаконъ кадит въ олтаре, на правую руку ходит съ кадиломъ. А они свидетельства никоего ни приношаху, но глаголаху: «Солнце праведное, Христосъ, на ада наступи, и смерть связа, и души свободи,[946] и того ради, — рече, — исходять на Пасху, то же прообразують на утрени». И много спирашася, не обретоша истинны. Того же лета родися великому князю сынъ Гаврило, месяца марта 26, и нарекоша имя ему Василей Парийский.[947] <...>