Церковный суд на Руси XI–XIV веков. Исторический и правовой аспекты

<…> По мале же времени доиде въ слухъ о немъ [об Антонии Римлянине] до святителя Никиты тогоже великаго Новаграда. святитель же Никита посла по него и повеле его привести предъ себя. преподобныи же во страсе велице бывъ, еще же и радостію одержимъ бысть, и иде ко святителю въ велице смиреніи. святитель же введе его в келію свою. и сотворивъ молитву преподобныи, и рече аминь. и пріемлетъ благословеніе отъ святителя со страхомъ и с любовію, яко отъ Божіа рукы. святитель же Никита провиде Святымъ Духомъ еже о преподобнемъ. и начатъ вопрошати его о отечестве. и о пришествіи его въ великіи Новградъ. откуду и како пріиде. преподобныи же святителю не хотя поведати таины, славы ради человеческіа. но токмо грешна себя именуя. святитель же Никита с великимъ прещеніемъ, еще же и съ заклинаніемъ, вопрошая преподобнаго и рече. мне ли брате не повеси таины своея. а веси яко Богъ имать открыти нашему смиренію яже о тебе. ты же судъ преслушаніа пріимеши отъ Бога. преподобныи же падъ предъ святителемъ на лицы своемъ, и плакаше горко. и моля святителя. да не повесть таины сея никомуже, дондеже преподобныи в жизни сеи. и поведа о себе таину на едине святителю Никите вся поряду. о отечествіи своемъ, и о воспитаніи. и о прихожденіи своемъ изъ Рима в великіи Новоградъ. яже исперва писана. святитель же Никита сія слышавъ отъ преподобнаго, не мняше его яко человека, (но) яко ангела Божіа. и воставъ отъ места своего. и отлагаетъ жезлъ пастырскіи. и на многъ часъ ста и моляся, и дивяся бывшему. яко же прославляетъ Богъ рабъ своихъ. по молитве же рече преподобныи аминь. святитель же Никита падъ предъ преподобнымъ на землю, прося благословеніа и молитвы отъ него. преподобныи же падъ предъ святителемъ на землю, моляся и прося благословеніа отъ святителя. себе же недостоина и грешна именуя. и оба лежаста на земли, плакастася, помочая землю на многъ часъ. другъ у друга благословеніа просяще и молитвы. святитель же Никита рече къ преподобному. ты великаго дара сподобленъ еси отъ Бога. и древнимъ чюдесем уподобился еси Иліи Фезвитянину, или апостоломъ, иже на Успеніе пречистеи Богородицы принесени быша на облацехъ. тако и градъ нашъ Господь присети тобою своимъ угодникомъ. новопросвещенныхъ людеи благослови и присети. преподобныи же рече ко святителю. ты еси іереи Бога вышняго, ты помазанникъ Божіи. тебе довлеетъ о насъ молитися. святитель же воставъ отъ земля и не можаше утешитися отъ слезъ. воздвизаетъ преподобнаго отъ земля. давъ ему благословеніе и о Христе целованіе. и много беседовавъ съ преподобнымъ. и никакоже можаше насытитися сладкыхъ и медоточныхъ словесъ техъ отъ преподобнаго. и хоте прославити чудо, но не хотяше преподобнаго моленіа презрети! святитель же Никита много моляше преподобнаго, дабы избралъ себе место потребно у него. и пребывалъ съ нимъ до исхода душа своея, преподобныи же никако восхоте сего сотворити. и отвещавъ рече. Господа ради святче Божій не нуди мене. довлеетъ бо ми на томъ месте терпети, идеже ми Богъ повеле. святитель же Никита давъ благословеніе, и отпусти преподобнаго съ миромъ на богоизбранное место. Не по мнозе времени поеха Никита епископъ ко преподобному Антонію видети камень и место. преподобныи же стояше на камени, аки на столпе, и никакоже схождаше моляся Богу день и нощь. и якоже узре святителя грядуща к нему, съшедъ с камене, и поиде во сретеніе ему, и пріимъ благословеніе и молитву отъ святителя. начатъ же святитель дивитися в себе о чудеси. и обхождаше место села того сюду и сюду. и рече ко преподобному святитель Никита, изволилъ Богъ и пречистая Богородица, и избра место сіе. хощетъ, да воздвигнется твоимъ преподобствомъ храмъ пречистыя Богородицы честнаго и славнаго ея Рожества. и будетъ обитель велія, во спасеніе мнихомъ. понеже на предпразднство того праздника на се поставилъ тя Богъ на месте семъ. преподобныи же рече. воля Господня да буди. святитель же хотя поставити ему хижицу близъ камени. преподобныи же сего никакоже восхоте, но всяку скорбь терьпяше Бога ради. святитель же Никита хотя истее уведети о чудеси, бояся искушеніа. начатъ разводя на едине селянъ техъ вопрашати о явленіи преподобнаго. они же единодушно реша ему, воистину святче человекъ сіи Божіи по водамъ принесенъ бысть на камени. и вся поряду ему известно изрекоша о преподобнемъ. святитель же наипаче возгореся духовною любовію ко преподобному. и дастъ благословеніе преподобному и отъеха ко святей премудрости Божіей Софеи во дворъ свои[373].