Проскинитарий. Хождение строителя старца Арсения Суханова в 7157 (1649) году в Иерусалим

От той церквицы мало пошед, на той же стране лествица вверх на Голгофу 18 ступеней. Гора Голгофа — то есть имя еврейским языком, а еллинским языком — край; тут верхняя кость от главы, сиречь лоб, понеже де ту погребена глава Адамова; иные же глаголют, яко Адам и Ева погребены суть в Хевроне со иными Патриархи, идеже Авраам, Исаак и Иаков; а ныне то место зовется Авраам; от Иерусалима по египетской дороге полтора дни ходу, живут все турки, а христиан нет там; и то есть место лобное, на нем же распят бысть Христос Бог наш, нашего ради спасения, якоже пишет Евангелие от Матф. зач. 112: «исходяще же обретоша человека Киринейска именем Симона, и сему задеша понести крест Его». Иоанн пишет сице в зач. 60: «поемше же Иисуса и ведоше; и нося крест Свой, изыде в глаголемое Лобное место, еже глаголется еврейски Голгофа, идеже пропяша Его, и с Ним ина два сюду и сюду, посреде же Иисуса; написа же и титла Пилат и положи на кресте... Ведый Иисус, яко вся уже совершишася, да сбудется Писание, глагола: жажду; сосуд же стояше полон оцта, они же исполнивше губу оцта и на трость вознше, придеша ко устом Его; егда же прияша оцет Иисус, рече: свершишася, и преклонь главу предает дух». От Матф. 113: «мимоходящии же хуляху Его, покивающе главами своими, и глаголюще: раззоряя церковь и треми денми созидаяй, спасися Сам, аще Сын еси Божий сниди со креста; такожде же и архиереи ругающеся с книжники и старцы и фарисеи глаголаху: иныя спасе, Себе ли не может спасти? аще Царь Израилев есть, да снидет ныне со креста, и веруем в Него; упова на Бога, да избавит ныне Его, аще хощет Ему, рече бо, яко Божий есмь Сын». Лука 111: «един же от обешеною злодею хуляше Его, глаголя: аще Ты еси Христос, спаси Себе и наю. Отвеща же другий, прещая ему, глаголя: ни ли ты боишися Бога, яко в томжде осужден еси? мы убо в правду, достойная бо по делом наю восприемлева, Сей же ни единого зла сотвори; глаголаше Иисусови: помяни мя Господи, егда приидеши во Царствии Си; и рече ему Иисус: аминь глаголю тебе, днесь со Мною будеши в раи». Матф. зач. 113: «от шестого же часа тма бысть по всей земли до часа девятаго; о девятом же часе возопи Иисус гласом великим, глаголя: Или, Или, лима савахвани, еже есть: Боже мой, Боже мой, вскую Мя еси оставил? Нецыи же от ту стоящих слышавше, глаголаху: яко Илию глашает Сей; и абие тек един от них, и прием губу, и исполнив же оцта, и вознес на трость, напояше Его; прочии же глаголаху: остави, да видим, аще приидет Илия спасти Его. Иисус же паки возопи гласом велиим, испусти дух; и се завеса церковная рездрася на двое, с вышняго края до нижняго, и земля потресеся, и камение распадеся, и гроби отверзошася, и многа телеса усопших святых восташа, и изшедше из гробов, по воскресении его внидоша во святый град и явишася мнозем». Иоанн же: «Иудее же, понеже пяток бе, да не останут на кресте телеса в субботу, бе бо велик день тоя субботы, молиша Пилата, да пребиют голени их и возмут; приидоша же воини и первому убо пребиша голени, и другому распятому с Ним; на Иисуса пришедше, яко видеша Его уже умерша, не пребиша Ему голени, но един от воин ребра Ему прободе, и абие изыде кровь и вода». Марк. 68: «видев же сотник, стоя прямо Ему, яко тако возопив издше, рече: воистину человек сей Сын бе Божий».

На горе Голгофе, идеже Крест Христов стоял, и та гора теперь покрыта вся мрамором, а идеже Крест стоял, и то место оставлено кругло, обложено серебром, а в глубь, идеже Крест стоял, будет с локоть, по левую страну креста, разселася гора. «Во время оно, егда на кресте возопи Иисус гласом великим, и испусти дух, и се завеса церковная раздрася на двое с вышняго края до нижняго, и земля потреся, и камение распадеся, и гроби отверзошася, и многа телеса усопших святых восташа, и исшедше из гробов, по воскресении его внидоша во святый град и явишася мнозем. Сотник же и с ним стрегущии Иисуса, видевше трус и бывшая, убояшася зело, глаголюще: воистину Сын Божий бе сей». Нецыи же глаголют, яко тою скважиною сниде Кровь Христова на главу Адамову, и егда сниде во ад с пречистою Своею Плотию и оттуду изведе Адама и Еву и прочих, яко писано: «во гробе плотски, во аде же с душею яко Бог, в раи же с разбойником и на престоле бяше Христе со Отцем и со Святым Духом, вся исполняя неописанный».