El Parnaso de Popoloj

Aĥ, kade je, ta kade je
Mojto serdce kleto?

—◡ | —◡ | —◡ | (—◡)

Kie vi, ho ensorĉita
Koro mia, estas?
Enuanta, suferanta
Kor’ ĉe mi ne restas.

Ne ĉi tie estas mia
Koro, la malsana,
Sed ĝi estas tie supre,
Sur montar’ Balkana.

Sed vi estas malproksime,
Balkanaro bela,
Vi patruja, sankta, kara
Hejmo subĉiela!

Kie ajn mi vage migrus,
Serĉas koro mia
Vin, mirinda, vin, gepatra
Loko familia!

Kie ajn en bela lando
Resti for mi devas,
Mi de l’ koro por ĉi tio
Dankon ne ricevas.

Por mi restas same karaj,
En kampar’, ĉe l’ maro,
Vi balkanaj, vi mirindaj
Montoj kaj tombaro.

Korsalutas mi montaron
Sub la neĝvualoj,
Vin, kvietaj ebenaĵoj
Kaj profundaj valoj!

Korsaluton al ombrecaj
Densaj vi arbaroj!
Korsaluton, bonodoraj
Verdaj vi herbaroj!

Korsaluton al balkanaj
Akvoj la arĝentaj,
Al ŝaŭmantaj akvofaloj,
Kaj al vi, torentoj!

Mi salutas vin, dezertoj,
Rokoj eĥoplenaj,
Intermontoj vi malsekaj,
Kavoj malserenaj!

Kie ajn vi estas, ventoj,
Perflugile venu,
Kaj kun Vi, al mia lando,
Korsalutojn prenu!

Ĉu mi sanas, aŭ malsanas,
Malbenita horo;
Sole tie, sole tie
Estas mia koro!

IV. Dana-Norvega

12. Elekto (El Björnstjerne Björnson)

Jeg vaelger mig april!
I den det gamle faller.
◡—◡ | —◡ | —(◡)

Mi voĉas por April’!
Malnovo tiam falas,
Novaĵ’ pri rajt’ batalas,
Fariĝas tial bruo;
Sed estas rekonstruo
Pli bona ol trankvil’.

Mi voĉas por April’!
Ĝi skuas malkviete,
Dissolvas, kaj ridete
Senkatenigas fonton,
Fortigas la estonton
De la somera bril’!

13. La nevidebla ĥoro (El «Brand» de Henrik Ibsen)

Aldrig, aldrig blir du lig ham,
Thi i ködet er du skabt.
◡—◡ | —◡ | —◡ |—◡ | (—)

Neniam, homo, vi similos Lin,
En korpo estas vi kreita;
Ĉu vi Lin sekvos, aŭ perfidos Lin,
Egale estas vi perdita.

Neniam, vermo, vi similos Lin,
De morto estas vi signita;
Ĉu vi Lin sekvos, aŭ perfidos Lin,
Egale estas vi juĝita.

Revul’, neniam vi similos Lin,
Vi estas senheredigita;
Ofero via ne riĉigos Lin,
Por tero estas vi kreita!

V. Finna

14. La funebro de patrino (El eposo «Kalevala»)

Emo tuosta itkemähän,
Kyynelvierus vieremähän.
—◡ | —◡ | —◡ | —◡